 |
| Micromax Canvas A110 |
കൂട്ടുകാരേ,
ഫോണിന്‍റെ എല്ലാ പ്രവര്‍ത്തനങ്ങളും ഉണ്ടാവുകയും, എന്നാല്‍ ഒരു ടാബ്ലെറ്റ് കമ്പ്യൂട്ടറിന്‍റെ വലിപ്പവുമുള്ള മൊബൈലുകളെ ആണ് ഫാബ്ലെറ്റുകള്‍ എന്ന് പറയുക. ഇപ്പോഴുള്ള ഫാബ്ലെറ്റുകള്‍ മിക്കവാറും 5" സ്ക്രീന്‍ സൈസ്‌ ഉള്ളവയാണ്. വിപണിയില്‍ സാംസങ്ങ്‌ ഗ്യാലക്സി നോട്ട് വിജയിച്ചതോടെയാണ് ഫാബ്ലെറ്റുകള്‍ അധികമായി വന്നു തുടങ്ങിയത്. പക്ഷേ സാംസംഗ് എന്ന ബ്രാന്‍ഡിന്കൊടുക്കേണ്ടി വരുന്ന വില അധികമാളുകള്‍ക്ക് താങ്ങാന്‍ കഴിയുന്നതല്ല. സാംസംഗ് ഗ്യാലക്സി നോട്ട് 1 വിപണിയില്‍ ഇപ്പോഴും 30,000 രൂപക്ക്‌ മുകളില്‍ ആണ് വില.
ഈ രംഗത്തേക്ക്‌ സാംസംഗിന് കടുത്ത മത്സരവുമായി ഒരു കൂട്ടം ഫാബ്ലെറ്റുകള്‍ വന്നിട്ടുണ്ട്. മൈക്രോമാക്സ്, കാര്‍ബണ്‍, സ്പൈസ്, വികിലീക്സ്‌, ഐ ബാള്‍ എന്നീ കമ്പനികള്‍ എല്ലാം തന്നെ വിലകുറഞ്ഞതും എന്നാല്‍സാംസംഗ് ഗ്യാലക്സിയുടെ എല്ലാ സൌകര്യങ്ങളും ഉള്‍പ്പെട്ട ഫാബ്ലെറ്റുകള്‍ വിപണിയില്‍ ഇറക്കിയിട്ടുണ്ട്. അവയില്‍ ഏറ്റുവും പുതിയ മോഡല്‍ ആയ മൈക്രോമാക്സിന്‍റെ A110 എന്ന മോഡലിനെ കുറിച്ച് അല്പം വിവരങ്ങള്‍ ഇവിടെ ടെക് ഗഡി പറഞ്ഞു തരാം.
കഴിഞ്ഞ ആഴ്ചയാണ് ടെക് ഗഡിയുടെ കയ്യില്‍ ഒരു പുതു പുത്തന്‍ മൈക്രോമാക്സ് A110 എന്ന മോഡല്‍ www.saholic.com എന്ന ഓണ്‍ലൈന്‍ സ്റ്റോര്‍ വഴി കിട്ടിയത്.
5" സ്ക്രീന്‍ സൈസ്‌ ഉള്ള ഈ ഫാബ്ലെറ്റ്‌ ആന്‍ഡ്രോയിഡിന്‍റെ മാര്‍ക്കെറ്റില്‍ ഇറങ്ങിയതില്‍ ഏറ്റുവും പുതിയ വേര്‍ഷന്‍ ആയ ഐസ്ക്രീം സാന്‍ഡ് വിച്ച് (Ice cream Sand witch 4.0.3) എന്ന ഓപ്പറേറ്റിങ്ങ് സോഫ്റ്റ്‌ വെയറുമായാണ് വിപണിയില്‍ എത്തിയിരിക്കുന്നത്. A110 വിന് തൊട്ടുമുന്‍പ്‌ ഇറങ്ങിയ A100 ന്‍റെ കുറവുകള്‍ എല്ലാം പരിഹരിച്ചാണ് A110 വന്നിട്ടുള്ളത്.
1 Ghz ഡ്യുവല്‍ കോര്‍ പ്രോസസര്‍ ആണ് A110 ന്. കോറുകളുടെ എണ്ണം കൂടും തോറും മൊബൈലിന്‍റെ പ്രവര്‍ത്തന ക്ഷമതയും കൂടും എന്നറിയാമല്ലോ. മള്‍ട്ടി ടാസ്കുകള്‍ അതായത് ഒരേ സമയത്ത്‌ ഒട്ടനവധി ആപ്ലിക്കേഷനുകളും, വീഡിയോ ഗെയിമുകളും പ്രവര്‍ത്തിപ്പിക്കാന്‍ ഈ ഡ്യുവല്‍ കോര്‍ സഹായിക്കും.
സാസംഗിന്‍റെ തന്നെ ഗ്യാലക്സി എസ് ത്രീ എന്ന മോഡലുമായി ഒരു വിദൂര സാമ്യം A110 നുണ്ട്. അതുകൊണ്ട് തന്നെ ഈ മൊബൈല്‍ വളരെ കനവും വണ്ണവും കുറഞ്ഞതാണ്. 9.7 mm മാത്രമാണ് ഈ മൊബൈലിന്‍റെ വണ്ണം,140 gm ഭാരവും. നാല് സൈഡും സാംസംഗ് മോഡലുകളെ പോലെ കര്‍വ് ഷെയിപ്പ് ആക്കിയത് കാഴ്ചക്ക്‌ നല്ല ഭംഗി നല്‍കും. സ്ക്രീന്‍ IPS ആണ്. അതായത് ഏത് കോണില്‍ നിന്ന് നോക്കിയാലും വ്യക്തമായ കാഴ്ച ഉറപ്പ്‌. ബാക്ക് കവര്‍ പ്ലാസ്ടിക്കിന്‍റെ നിലവാരം അല്പം കൂടി ഉയര്‍ത്താമായിരുന്നു.
പിന്നിലും മുന്നിലും ക്യാമറയുമായാണ് A110 വന്നിരിക്കുന്നത്. മുന്‍പത്തെ മോഡലില്‍ ഉണ്ടായിരുന്ന 5 മെഗാ പിക്സല്‍ ക്യാമറയെ 8 മെഗാ പിക്സല്‍ ആക്കി ഉയര്‍ത്തിയാണ് A110 അവതരിപ്പിച്ചിരിക്കുന്നത്. ക്യാമറ ക്വാളിറ്റി മധ്യ നിലവാരം പുലര്‍ത്തുന്നു. HD റിക്കോര്‍ഡിംഗ് ഉണ്ട് എന്നതാണ് എടുത്തു പറയേണ്ട ഒരു സവിശേഷത. അല്പം പുറത്തേക്ക്‌ തള്ളി നില്‍ക്കുന്ന പിന്‍ ക്യാമറ ചിലരിലെങ്കിലും അസ്വസ്ഥത ഉണ്ടാക്കാന്‍ ഇടയുണ്ട്.
32 GB എസ് ഡി കാര്‍ഡ്‌ വരെ A110 സപ്പോര്‍ട്ട് ചെയ്യും. റാം 512 MB ആണ്. അത് ഈ വിഭാഗത്തില്‍ ഉള്ളവയില്‍ ശരാശരി ആണ്. ഇന്‍ബില്‍റ്റ് മെമ്മറി 4GB ഉണ്ട്. അതില്‍ 2GBആപ്ലിക്കേഷനുകള്‍ക്ക് മാറ്റി വെച്ചിരിക്കുന്നു. ബാക്കിയുള്ള 2GB ഉപഭോക്താവിന് യഥേഷ്ടം ഉപയോഗിക്കാം. അതായത് മെമ്മറി കാര്‍ഡ്‌ വാങ്ങി ഇട്ടില്ലെങ്കിലും അത്യാവശ്യം ഫോട്ടോകള്‍ എടുക്കാനും, പാട്ടുകള്‍ ശേഖരിക്കാനും A110 ല്‍ തന്നെ സ്ഥലമുണ്ടെന്ന് സാരം.
A110 അവതരിചിരിക്കുന്നത് ആന്‍ഡ്രോയിഡിന്‍റെ ഏറ്റുവും പുതിയ വേര്‍ഷന്‍ ആയ ഐസ്ക്രീം സാന്‍ഡ് വിച്ച് (Ice cream Sand witch 4.0.3) എന്ന ഓപ്പറേറ്റിങ്ങ് സോഫ്റ്റ്‌ വെയറുമായാണ്എന്ന്‍ പറഞ്ഞല്ലോ. അതുകൊണ്ട് തന്നെ സാംസംഗ് എസ് ത്രീ യില്‍ പ്രവര്‍ത്തിക്കുന്ന എല്ലാ സോഫ്റ്റ്‌ വെയറുകളും A110 ലും പ്രവര്‍ത്തിക്കും.ഒട്ടനവധി ആപ്ലിക്കേഷനുകള്‍ മുന്‍പേ തന്നെ ഇന്‍സ്ടാള്‍ ചെയ്തിട്ടാണ് A110 വിപണിയില്‍ എത്തുന്നത്. കൂടാതെ വിശാലമായ ഗൂഗിള്‍ പ്ലേ സ്റ്റോറില്‍ നിന്ന് വിവിധ ആപ്ലിക്കേഷനുകള്‍ നമുക്ക്‌ ആവശ്യാനുസരണം ഡൌണ്‍ലോഡ്‌ ചെയ്തെടുക്കാനും സാധിക്കും. ഓപ്പറേറ്റിംഗ് സിസ്റ്റം അപ്ഗ്രേഡ് ചെയ്യാന്‍ സാധിക്കും എന്നതാണ് A110 ന്‍റെ മറ്റൊരു പ്രത്യേകത.ഇപ്പോള്‍പരീക്ഷണങ്ങള്‍ കഴിഞ്ഞിറങ്ങിയ ജെല്ലിബീന്‍ എന്ന വേര്‍ഷനിലേക്ക് A110 ന്‍റെ സോഫ്റ്റ്‌ വെയര്‍ ഉയര്‍ത്താന്‍ കഴിയുമെന്ന് കരുതുന്നു.
വൈഫൈ, ബ്ലൂ ടൂത്ത്‌ എന്നീ സൌകര്യങ്ങള്‍ A110 ല്‍ ഉണ്ട്. കൂടാതെ വൈഫൈ ഉപയോഗിക്കാന്‍ കഴിയുന്ന ഉപകരങ്ങള്‍ക്ക് ഇന്‍റര്‍നെറ്റ് ഷെയര്‍ ചെയ്യാന്‍ കഴിയുന്ന വൈഫൈ ഹോട്ട് സ്പോട്ട് എന്ന സാങ്കേതികത്വം A110 ലുണ്ട്. കൂടാതെ ഇതൊരു ഡ്യുവല്‍ സിം, ഡ്യുവല്‍ സ്റാന്‍ഡ്‌ബൈ ഫോണ്‍ ആണ്. അതായത് രണ്ടു സിമ്മുകളും ഒരേ സമയം ഉപയോഗിക്കാന്‍ സാധിക്കും. പഴയ ഡ്യുവല്‍ ഫോണുകളെ പോലെ സിമ്മുകള്‍ മാറി മാറി സിലക്റ്റ്‌ ചെയ്യേണ്ടതില്ല എന്ന് സാരം. പ്രീ സെറ്റ് ആയ അഞ്ച് ഹോം സ്ക്രീനുകള്‍ A110 നുണ്ട്. അവയില്‍ നമ്മുടെ ഇഷ്ടാനുസരണം ആപ്ലിക്കേഷന്‍ ഐക്കണുകള്‍ സെറ്റ് ചെയ്യാം.
A110 3G സപ്പോര്‍ട്ട് ചെയ്യുന്ന ഒരു ഫോണാണ്. വീഡിയോ കാളിംഗ് സൌകര്യത്തിനായി മുന്‍പില്‍ 0.3 മെഗാപിക്സല്‍ ക്യാമറയും കൊടുത്തിട്ടുണ്ട്. സാങ്കേതിക മികവുകൊണ്ട് നല്ല സിഗ്നല്‍ ക്വാളിറ്റിയും, നല്ല സൌണ്ടും ഉണ്ട് A110 ന്. 3.5mm ഓഡിയോ ജാക്ക് നല്ല ശബ്ദ വിസ്മയം ഉണ്ടാക്കുന്നു.
കൂടാതെ ജി സെന്‍സര്‍, ലൈറ്റ് ഒപ്ടിമൈസേഷന്‍, എ ജിപി എസ് എന്നിവയും A110 ല്‍ ഉണ്ട്. പവര്‍ ഓണ്‍, വോളിയം എന്നിവയൊഴികെ യാതൊരു ഫിസിക്കല്‍ ബട്ടണുകളും A110 ല്‍ ഇല്ല. സ്ക്രീനില്‍ ഉള്ള ഹോം, ബാക്ക്, സെറ്റിംഗ്സ് ബട്ടണുകള്‍ എല്ലാം സ്ക്രീന്‍ ഓണ്‍ ആയാല്‍ മാത്രം വര്‍ക്ക്‌ ചെയ്യുന്നവയാണ്.
ചാര്‍ജര്‍ കേബിള്‍ തന്നെ ഡാറ്റാ കേബിള്‍ ആയി ഉപയോഗിക്കാന്‍ കഴിയുന്ന വിധത്തില്‍ ആണ് A110ല്‍. അതിനാല്‍ കൂടുതല്‍ സാധനങ്ങള്‍ യാത്രകളില്‍ വാരിവലിച്ച് കൊണ്ട് പോകാതെ കഴിയാം. 2000 mAh ബാറ്ററിയുമായാണ് A110 വന്നിരിക്കുന്നത്. ഒരു ഫാബ്ലെറ്റിനെ സംബന്ധിച്ചിടത്തോളം 2000 mAh എന്നത് അല്പം നിരാശാജനകം എന്ന് പറയാതെ വയ്യ. എന്നാലും ഭേദപ്പെട്ട പ്രകടനം ബാറ്ററി കാഴ്ച വെക്കുന്നുണ്ട്. 5 മണിക്കൂര്‍ തുടര്‍ച്ചയായി സംസാരിക്കാനും, 180 മണിക്കൂര്‍ സ്റാന്‍റ് ബൈ ആയും A110 പ്രവര്‍ത്തിക്കുമെന്ന് മൈക്രോമാക്സ് അവകാശപ്പെടുന്നു.
എല്ലാത്തിലും ഉപരിയായി പറയേണ്ടത്‌ മൈക്രോമാക്സ് A110 ന്‍റെ വിലയാണ്. വെറും Rs.9,999 രൂപക്കാണ് ഈ സ്മാര്‍ട്ട് ഫോണ്‍ വിപണിയില്‍ ലഭിക്കുന്നത്. ഇതേ സൌകര്യങ്ങള്‍ ഉള്ള സാംസംഗ് S III ക്ക് Rs.37,000 ഓളം വിലയുണ്ട് എന്നറിയുമ്പോള്‍ ആണ് മൈക്രോമാക്സിന്‍റെ മഹത്വം മനസ്സിലാകുക. ഒരു വര്‍ഷം ഗ്യാരന്‍റിയോട് കൂടി എത്തുന്ന മൈക്രോമാക്സ് A110 ക്ക് കേരളത്തില്‍ തൃശ്ശൂരും, കൊച്ചിയിലും സര്‍വീസിംഗ് സൌകര്യവും ഉണ്ട്.
ഫോണിന്‍റെയും, ടാബ്ലെറ്റിന്‍റെയും സൌകര്യങ്ങള്‍ ഒരുമിച്ചുള്ള ഈ സ്മാര്‍ട്ട് ഫോണ്‍ കുറഞ്ഞ ബഡ്ജറ്റില്‍ സാംസംഗ് എസ് ത്രീ സൌകര്യങ്ങള്‍ വേണമെന്ന് ആഗ്രഹിക്കുന്നവര്‍ക്ക് വാങ്ങാവുന്ന ഒരുത്തമ ഫോണ്‍ ആണ്.
ഉള്‍പ്പെടുത്തേണ്ട കാര്യങ്ങള്‍ കൂട്ടുകാര്‍ നിര്‍ദ്ദേശിച്ചാല്‍ പോസ്റ്റുകള്‍ കൂടുതല്‍ നല്ലതാക്കാംആയിരുന്നു. കൂടാതെ ഇതിനു പുറമേ അറിയേണ്ട കാര്യങ്ങള്‍ കമന്റുകളില്‍ കൂടി ചോദിക്കാവുന്നതാണ്.
ReplyDelete